Skip to content Skip to left sidebar Skip to right sidebar Skip to footer

Mirë Se Vini Në Faqen Zyrtare të Bashkisë Mirditë

Bashkia Mirditë pjesëmarrëse në Tourisim & Travel Show Albania 2024

Bashkia Mirditë për herë parë ishte pjesëmarrëse si një nga 100 ekspozuesit, në Panairin e Turizmit “Tourism & Travel Show Albania 2024” të zhvilluar në datat 31 janar- 1 shkurt në Pallatin e Kongreseve.

Me 30 blerës ndërkombëtarë nga e gjithë bota si Kroaci, Itali, Angli, Irlandë, Zvicër, Hollandë, Portugali, SHBA, Indi, panairi i turizmit shërbeu si platforma ideale për përfshirjen e Mirditës në agjendat e operatorëve turistikë, dhe promovimin e saj kundrejt aktorëve publikë dhe privatë të turizmit edhe në nivel ndërkombëtar.
Bashkia Mirditë shpalosi në stendën e saj denjësisht ofertën e saj turistike, potencialin e jashtëzakonshëm të zhvillimit, nëpërmjet turizmit të qëndrueshëm.

“Mirdita, Zemra Magjike, E egër, Romantike e Shqipërisë Qëndrore Veriore” (Mirdita, Magical, Wild Romantic Heart of Central -Nothern Albania) është një nga ofertat turistike kryesore që Mirdita tashmë ofron falë kontributit të pakushtëzuar të znj. Marianne Graff Albania Austria Partnerschaft.

Gjithashtu ofertës turistike të Mirditës i është shtuar “Rruga Kulturore e Mirditës” një projekt i Qendrës Shqiptare për Edukim dhe Zhvillim, zbatuar nga Unops.

Në forumin mbi strategjinë e turizmit dhe qëndrueshmërinë nëpër Bashki, kryetarët e bashkive Mirditë z. Albert Melyshi, Vlorë z. Ermal Dredha, Sarandë z. Oltion Çaci, dhe Lushnje znj.Eriselda Stefa diskutuan e paraqitën mundësitë e planet përkatëse në rrafshin lokal, mbi strategjinë e turizmit të qëndrueshëm, si objektiv që do të udhëheqë qytetet tona, si destinacione kryesore për turistët.

Natyra dhe arti i njeriut e ka bekuar Mirditën me një numër të madh monumentesh natyrore, kulturore, gjeologjike.
Me kushte të përshtatshme klimatike, peisazh të bukur, prodhime bujqësore e blegtorale, traditë kulturore dhe etnografike të larmishme, Mirdita gëzon potencial për zhvillimin e turizmit gjatë gjithë vitit.

Falenderojmë të gjithë organizuesit që bënë të mundur përfaqësimin e Bashkisë Mirditë në panairin e turizmit: Marianne Graf,Nikolin Jaka, Infokulla Mirdita, Nik Nikolli, Rafaela Rica,Iceberg Exhibitions, UNOPS Albania, EU4Culture Albania, Ministria e Turizmit dhe Mjedisit.

 

Nënshkrimi i marrëveshjeve të bashkëpunimit për dy projekte të rëndësishme në zhvillimin e Mirditës

Bashkia Mirditë ka nënshkruar marrëveshje të bashkëpunimit për dy projekte të rëndësishme për zhvillimin e Mirditës.

Projekti i parë, “EFFORT”
Bashkia Mirditë, Komuna Junik dhe Co Plan janë bashkëpërfituese të projektit EFFORT – Enhancing Facilities for a Future with an Optimal Resource and Energy Efficiency Trajectory, në programin ndërkufitar Shqipëri -Kosovë, asistencë financiare në kuadër të IPA II (Instrument për Asistencën e Paraderimit), financuar nga Bashkimi Evropian.
Projekti synon përmirësimin e efiçencës energjetike të ndërtesave publike në të dy njësitë vendore Mirditë -Junik si dhe zvogëlimin e ndjeshëm të konsumit të energjisë, duke instaluar pajisje inovative dhe duke promovuar më tej praktikat e qëndrueshme të menaxhimit të ndërtesave.
Ky projekt do të sjellë mundësi për të përmirësuar cilësinë e jetës së banorëve të Mirditës, rritje profesionale të nxënësve të shkollave profesionale, efiçencë energjetike dhe mundësi të reja për zhvillim ekonomik.

Projekti i dytë, “Mirdita Junik”
“Mirdita Junik” është një përpjekje e përbashkët me CHwB Kosova, Bashkisë Mirditë, Komunës Junik dhe Qendrës UET.
Ky projekt synon të krijojë një infrastrukturë turistike të qëndrueshme në zonën kufitare mes Shqipërisë dhe Kosovës, duke kontribuar në rritjen ekonomike të komuniteteve lokale, duke ofruar mundësi punësimi për qytetarët dhe duke ruajtur dhe promovuar trashëgiminë kulturore dhe natyrore të rajonit.

Ditën e premte, datë 26.01.2024 në Bashkinë Mirditë u zhvillua takimi fillestar ndërmjet palëve përfituese të këtyre dy projekteve. Kryetari i Bashkisë Mirditë Z. Albert Melyshi mirëpriti Kryetarin e Komunës së Junikut Z. Ruzhdi Shehu, Drejtorin e Trashëgëmisë Kulturore pa Kufij në Kosovë Z. Sali Shoshi dhe Drejtoreshën e Co PLAN Znj. Anila Bejko.
Takimi konsistoi në prezantimin hyrës të partneritetit dhe nënshkrimin e marrëveshjeve të bashkëpunimit.

 

 

LAJM !

Me datë 19.01.2024 Bashkia Mirditë zhvilloi një vizitë të përbashkët me përfaqësues nga O.D.C (Office of Defense Cooperation), Ambasada Amerikane në Shqipëri, Agjencia Kombëtare e Mbrojtjes Civile, Drejtoria e Përgjithshme e Mbrojtjes nga Zjarri dhe Shpëtimit në zonën e Ish-Stacionit të Trenit, rruga “Imzot Zef Skana” Rrëshen, ku është parashikuar të ndërtohet stacioni i ri zjarrëfikës.
Në këtë takim u diskutuan çështje teknike të zbatimit të këtij projekti.
Ky bashkëpunim vjen si një domosdoshmëri për Mirditën për të patur një stacion zjarrëfikës bashkëkohor dhe efiçent.

   

Punimet për Mbrojtjen nga Përroi Jezull në Fshatin Jezull

Bashkia Mirditë në bashkëpunim me Ministrinë e Mbrojtjes përfundoi me sukses punimet për “Mbrojtjen nga përroi Jezull në fshatin Jezull”, Njësia Administrative Rrëshen.
Nga ky investim mbrohen tokat bujqësore të një pjese të fshatit nga përmbytjet dhe vihet në funksion pas një bllokimi disavjecar edhe rruga e vjetër që lidh fshatin Jezull me qytetin Rrëshen.

Bashkojmë zemrat e dhurojmë dashuri!

FTESË E HAPUR
Bashkojmë zemrat e dhurojmë dashuri!
Rrëshen, më 23 dhjetor 2023,

Drejtuar çdo mirditori vullnetmirë e zemërgjerë, që në këtë prag festash të bashkohemi të gjithë, duke treguar si gjithmonë vlerat e larta njerëzore dhe bujarinë që ndër shekuj na ka karakterizuar! Le të heqim diçka nga vetja, familja jonë, për ta ndarë me ata që kanë më shumë nevojë e më pak mundësi!
Me iniciativën e Bashkisë Mirditë në bashkëpunim me Motrat e Shën Xhovanna Antidës dhe Vizion OJF është ndërmarrë një nismë bamirësie, e cila ka filluar me kontributin e të gjithë punonjësve të Bashkisë, duke vijuar më tej me këtë ftesë të hapur drejtuar çdo qytetari mirditas, brenda dhe jashtë kufijve të vendit, biznesmenë e kushdo tjetër, për të kontribuar me zemër sipas mundësisë, për familjet në nevojë në zonën tonë.
Faleminderit dhe për shumë mot Krishtlindjen dhe Vitin e Ri 2024!
Urojmë begati në familjet tuaja!

*Komisioni i mbledhjes së kontributeve ndodhet në sallën e
Këshillit Bashkiak Mirditë, ditën e martë, datë 26 dhjetor ora 08:00- 14:00.

Email: info@bashkiamirditë.gov.al
Nr. Kontakti:
☎️+3552162333
+355695755444
+355696890984

Veshja tradicionale e gruas Mirditore

Veshja tradicionale e gruas mirditore shpallet ”Kryevlerë Kombëtare e Trashëgimisë Kulturore Jomateriale (shpirtërore)”.

Me propozimin e Unionit Mirdita, Këshilli Kombëtar i Trashëgimisë Kulturore Jomateriale pasi shqyrtoi dosjen e dërguar, vendosi që kjo veshje e hershme, që pavarësisht mbishtresëzimeve kulturore, ruan një larmi simbolesh të natyrës mitike dhe kultike, të shpallet ”Kryevlerë Kombëtare e Trashëgimisë Kulturore Jomateriale (shpirtërore)”.

Pas shpalljes ”Kryevlerë Kombëtare e Trashëgimisë Kulturore Jomateriale (shpirtërore)”, në një fazë tjetër, mund të përgatitet dosja për në UNESCO.