Skip to content Skip to left sidebar Skip to right sidebar Skip to footer

Mirë Se Vini Në Faqen Zyrtare të Bashkisë Mirditë

Thirrje për Aplikime – Bashkia Mirditë në Partneritet me Programin ReLOaD3

Bashkia Mirditë, në bashkëpunim me Programin ReLOaD3, shpall Thirrjen e Parë Publike për Organizatat e Shoqërisë Civile (OSHC) që të dorëzojnë projekt-propozime në përputhje me objektivat zhvillimor dhe prioritetet e Bashkisë Mirditë.

Qëllimi i Programit ReLOaD3 është forcimi i bashkëpunimit mes qeverisjes vendore dhe OSHC-ve në Ballkanin Perëndimor, duke mbështetur transparencën, pjesëmarrjen qytetare dhe një mjedis më të favorshëm për organizatat e shoqërisë civile.

Prioritetet e thirrjes janë:

1. Promovimi i trashëgimisë kulturore dhe identiteti lokal  

1.1 Promovimi i pikave turistike në zona të ndryshme të bashkisë Mirditё, trashëgimisë historike e kulturore të Mirditës, përfshirë figurat, traditat, arkitekturёn, artizanatin, kulinarinë dhe veshjet popullore.

1.2 Hartimi i dokumentave strategjike dhe nisma pёr zhvillimin e turizmit nё Bashkinё Mirditё, interpretimin e monumenteve, dhe përfshirjen e brezit të ri në ruajtjen e identitetit lokal.

1.3 Krijimi i hapësirave të reja muzeale dhe shërbimeve të reja për zhvillimin e potencialve turistike e kulturore dhe informimin mbi to.

2. Mbrojtja e Mjedisit 

2.1 Ndërgjegjësim i komunitetit mbi mbrojtjen e mjedisit, parandalimin dhe menaxhimin e rreziqeve në territorin e Bashkisë, nëpërmjet pilotimit të modeleve

3. Rinia 

3.1 Nxitja e pjesëmarrjes aktive së të rinjve, me fokus të rinjtë që jetojnë në Njësitë Administrative.

3.2  Strategji lokale pёr rininё, module trajnimi dhe materiale shtesë mbi fusha të ndryshme me interes për rininë.

Shuma e fondeve për projektet e miratuara do të jetë nga 1.000.000 Lekë deri 2.500.000 Lekë.

Kohëzgjatja e projektit: 6 – 10 muaj

Afati për dorëzimin e aplikimeve

09 dhjetor 2025– 20 Janar 2026.

Për më shumë informacion dhe për të tërhequr dokumentacionin e aplikimit, kontaktoni në:

Email: info@bashkiamirdite.gov.al

Adresa: Bashkia Mirditë, Zyra e  Pritjes së Qytetarëve, Sheshi “Abat Doçi” Rrëshen.

Vizitoni faqen tonë për detaje të tjera: www.bashkiamirdite.gov.al

 

Ndezja e Dritave të Pemës së Krishtlindjes

Ndërsa përgatitemi për periudhën më të bukur të vitit, më datë 6 dhjetor, ora 18:20, ju ftojmë të mblidhemi së bashku në sheshin “Abat Doci”, për të ndezur dritat e Pemës së Krishtlindjes dhe për të hapur atmosferën magjike të festave.

Ju mirëpresim!

Një aktivitet i veçantë u zhvillua në Bashkinë Mirditë, duke bashkuar artistët e vegjël – instrumentistët, valltarët, këngëtarët – mësuesit e tyre, si dhe brezat e kaluar të QKF-së.

Fëmijët e artistët e vegjël janë ata që gjallërojnë çdo rast feste dhe gëzimi në Mirditë, duke na bërë të gjithëve krenar për talentin dhe energjinë e tyre.

Në shenjë vlerësimi për përkushtimin e tyre ndaj mësimdhënies dhe vazhdimësisë së trashëgëmisë sonë artistike, kryetari i Bashkisë Mirditë ndau certifikata mirënjohjeje për:
Z. Kol Picaku, Z. Fran Gjergji, Z. Ilirjan Simoni dhe Z. Angjelo Gjoka, si dhe për të gjithë artistët pjesëmarrës.

Aktiviteti u mbyll me një performancë të fëmijëve në çifteli duke shfaqur pasionin për muzikën tonë tradicionale.

Kardinali Ernest Simoni Troshani në Mirditë

Më 20 nëntor 2025, Kardinali Ernest Simoni Troshani vizitoi Katedralen “Jezusi i Vetmi Shpëtimtar i Botës” në Rrëshen, ku kremtoi Meshën e Shenjtë për komunitetin e Mirditës.

Kardinali Simoni, i lindur në vitin 1928 në Troshan të Lezhës, ka kaluar 28 vite burg dhe punë të detyruar gjatë regjimit komunist.

Pas viteve ’90, ai vijoi shërbimin meshtar dhe në vitin 2016 u nderua me titullin Kardinal nga Papa Françesku.

Prania e tij në Rrëshen përbën një kujtesë të gjallë të forcës së shpirtit njerëzor, të qëndresës dhe besimit të palëkundur.

Kryetari i Bashkisë Mirditë, z. Albert Melyshi, i dorëzoi Kardinalit Ernest Simoni Troshani, një mirënjohje në emër të Bashkisë Mirditë, në nder të kontributit të tij të jashtëzakonshëm.

Programi i Rijetëzimit të Kullave

Bashkia Mirditë dhe Qarku Lezhë, të njohur për trashëgiminë dhe kullat historike, janë përfshirë në Programin e Rijetëzimit të Kullave, një nismë që synon të ruajë këtë pasuri unike kulturore dhe ta kthejë në një motor të zhvillimit lokal .

Në Mirditë, kullat nuk janë thjesht monumente arkitekturore – ato janë pjesë e identitetit, besës dhe mikpritjes tradicionale .

Ky program i ri, i mbështetur nga GIZ Shqipëri, synon t’i rikthejë këto kulla si hapësira për turizmin, kulturën dhe ekonominë lokale.

  • Takimi i radhës me ekspertët e GIZ do të fokusohet te Faza I (2025–2026), konkretisht në identifikimin e kullave me potencial për restaurim.
  • Thirrje për pronarët e kullave dhe komunitetin lokal.
    Bashkia Mirditë fton të gjithë pronarët e kullave dhe familjet që i trashëgojnë këto objekte të shprehin interesin për t’u përfshirë në procesin e identifikimit.
  • Data: 03.12.2025
  • Vendi: Salla e Këshillit Bashkiak, Mirditë⏰ Ora: 11:00

Ju mirëpresim!

Delegacioni i Kongresit të Autoriteteve Vendore vizitë monitorimi në Bashkinë Mirditë.

Më datë 18 Nëntor 2025, Delegacioni i Kongresit të Autoriteteve Vendore të Këshillit të Evropës zhvilloi një vizitë monitorimi në Bashkinë Mirditë, në kuadër të procesit të vlerësimit të zbatimit të angazhimeve të vendeve anëtare ndaj Kartës Evropiane për Vetëqeverisjen Vendore.

Delegacioni u drejtua nga Z. Anders Knape (Suedia) dhe Z. Sören Schumacher (Gjermania), të shoqëruar nga përfaqësuesja e Sekretariatit të Kongresit, znj. Svitlana Pereverten, si dhe Prof. Zoltán Szente, ekspert i pavarur i Kartës së Vetëqeverisjes Vendore.

Gjatë takimit me Kryetarin e Bashkisë Mirditë, Z. Albert Melyshi, u diskutuan çështje kyçe që lidhen me funksionimin e pushtetit vendor, përfshirë:
– autonominë e njësive të vetëqeverisjes vendore,
– çështjet e decentralizimit financiar,
– ndërhyrjet në kompetencat e bashkive,
– sfidat në funksionimin efektiv të institucioneve vendore.

Kryetari i Bashkisë Mirditë paraqiti shqetësimet kryesore të bashkisë duke theksuar nevojën për rritjen e mbështetjes nga niveli qendror dhe forcimin e bashkëpunimit ndërinstitucional me qëllim garantimin e një funksionimi të qëndrueshëm dhe efektiv të vetëqeverisjes vendore.

Pas përfundimit të të gjitha vizitave monitoruese në Shqipëri, do të përgatitet një Raport dhe një Rekomandim zyrtar për Shqipërinë, të cilat do t’i paraqiten për shqyrtim dhe miratim Kongresit të Autoriteteve Vendore të Këshillit të Evropës në sesionet e radhës.

Situata nga reshjet në Mirditë.

Komisioni Vendor i Planifikimit dhe Përballimit të Emergjencave Civile u mblodh sot për të koordinuar dhe menaxhuar situatën e shkaktuar nga reshjet e dendura të shiut, që po sjellin dëmtime në rrugë, ura dhe disa banesa në territorin e Mirditës.

Në fshatin Jezull (Njësia Administrative Rrëshen), është dëmtuar shpatulla mbështetëse e një ure tip Bejli, duke bërë të pamundur kalimin e rrugës dhe duke e nxjerrë urën jashtë funksionit.

Aksi rrugor Rrëshen–Bukmirë është problematik, me gurë të rrëshqitur dhe gërryerje të bazamentit të rrugës.

Në fshatin Kodër-Rrëshen ka rrëshqitje toke pranë një banese.

Në lagjen Mollaj, dalja e përroit ka sjellë gurë në rrugë.

Në Njësinë Administrative Orosh janë dëmtuar rrugët e fshatrave Bulshar, Grykë-Orosh, Nënshejt, Pëshqesh dhe Kullaxhi.

Në Njësinë Administrative Selitë është bllokuar rruga që lidh fshatrat Bardhaj dhe Lëkundë.

Në Njësinë Administrative Kthellë paraqiten dëmtime në fshtrat: Tharri, Shebe, Përlat Qendër, Troje dhe Prosek, veçanërisht në lagjet Vadhishtë, Kabal dhe Curgu.

Në Njësinë Administrative Kaçinar është dëmtuar ura që lidh fshatin Shpërdhazë dhe rruga lidhëse me lagjen Preçaj në Simon, si pasojë e rritjes së nivelit të përrojt.

Në Njësinë Administrative Fan janë dëmtuar rrugët që lidhin fshatrat Shëngjin, Klos, Munellë dhe Zall Xhuxhë; disa ura pasarela në Thirrë, Bisakë dhe Xhakëz mbahen nën monitorim, ndërsa pas qetësimit të situatës do ndërhyhet për riparimin e tyre.

Në aksin Përlat–Lurë ka gurë dhe dhera në rrugë; firma kontraktore që po ndërton segmentin është njoftuar dhe pritet ndërhyrja.

Sipas informacioneve për Hidrocentralin e Qafmollës nuk parashikohen shkarkime gjatë orëve në vijim, por po mbahet kontakt i vazhdueshëm me përfaqësuesit e Hec-it.

Ekipet e Bashkisë Mirditë janë në terren dhe po ndërhyjnë aty ku është e mundur për rehabilitimin e rrugëve, ndërsa struktura e Mbrojtjes Civile po monitoron situatën dhe mbetet në gatishmëri për çdo emergjencë.