Falë kontributit të Forcave të Armatosura, 900 banorë të fshatrave Klos e Fan, prej ditës së sotme do ta kenë më të lehtë të shkojnë në shkolla, qendra shëndetësorë, apo për t’u lidhur me pjesën tjetër të Shqipërisë përmes Rrugës së Kombit.

I pranishëm në inaugurimin e kësaj Ure, Kryetari I Bashkisë së Mirditës, z. Ndrec Dedaj u shpreh se: Kjo urë ishte e domosdoshme pasi fëmijet kalonin në një urë tejet të amortizuar, pas  asnjë lloj sigurie dhe që kalohet me shumë vështirësi. Kjo urë ndërlidh një komunitet rreth 800 banorësh.

Ministrja e Mbrojtjes, Olta Xhaçka gjatë inspektimit të përfundimit të punimeve për urën “Bailey”, vlerësoi kontributin e FA dhe ekspertëve xhenio në komunitet.
Dua të falënderoj efektivët tanë për punën e shkëlqyer që kanë bërë.

Me komunitetin, për komunitetin” është moto e Forcave tona të Armatosura. Në dy vitet e fundit, efektivët xhenio i kanë lehtësuar komunikimin 60 mijë banorëve nga jugu në veri të vendit, falë 16 urave Bailey. Përmes këtij kontributi, FA kanë lehtësuar shërbimet për mijëra familje, kryesisht në zonat rurale dhe ato me distancë të largët nga qendrat e qyteteve, duke krijuar mundësi më të mira për frekuentimin e fëmijëve në shkolla, vizitat në qendrat shëndetësore, apo shfrytëzimin e bujqësisë në dobi të ekonomisë familjare, – tha ministrja e Mbrojtjes.

Për ministren Xhaçka, vëmendja ndaj komunitetit, veçanërisht gjatë emergjencave civile është një ndër prioritetet kryesore të institucionit që ajo drejton.

Përmes ligjit të ri ‘Për Mbrojtjen Civile’, do të ketë një kordinim më të mirë të të gjithë aktorëve, për t’i ardhur në ndihmë komunitetit në rast fatkeqësish natyrore apo në problemet e infrastrukturës. Brenda pak javësh do të mbërrijnë mjetet dhe uniformat e reja për ekipet e kërkim – shpëtimit, zjarrfikësit dhe ekipet tona të specializuara në emergjenca, si përgjigja më e mirë ndaj kërkesave të kohës

Ura bailey që do t’u shërbejë banorëve të Fanit dhe Klosit ka një gjatësi prej 24 metrash dhe u bë e mundur falë bashkëpunimit të ekspertëve xhenio, të profilizuar më së miri në ndërtimin e urave të tilla, me bashkinë e Mirditës.
Ministrja e Mbrojtjes shoqërohej nga deputetja Lindita Nikolla dhe kryebashkiaku i Mirditës, Ndrec Dedaj.

Leave a Comment