Mirë Se Vini Në Faqen Zyrtare të Bashkisë Mirditë

Në ditën e Zisë Kombëtare 13 shkurt të shpallur nga qeveria shqiptare, Bashkia Mirditë iu bashkua lutjes mbarëkombëtare për viktimat e tragjedisë së madhe të shkaktuar nga tërmeti në kufirin turko-sirian. Përmes kremtimit të një meshe të shenjtë në Katedrale të udhëhequr nga Ipeshkvi i Dioqezës Mons. Gjergj Meta, dhe më pas së bashku me qytetarët e shumtë për të ndezur qirinj, në sheshin “Abat Doci” në shenjë lutjeje për viktimat e shumta nga tërmeti apokaliptik në Turqi dhe në Siri. 

Edhe në qytetin tonë mbizotëroi solidariteti kolektiv për të lehtësuar sadopak dhimbje të tejskajshme njerëzore. Mirdita, përmes gjesteve të tilla domëthënëse, vazhdon të ruajë traditën e ndarjes së dhimbjes me të tjerët në raste fatkeqësie, një nga virtytet më hyjnore që e kemi të trashëguar nga të parët tanë.

Zhvilluam së bashku me Zv/Drejtuesen e projektit “BE për Bashkitë” Znj. Entela Pinguli takimin e fillimit të projektit me bashkëfinancim nga Bashkimi Evropian dhe Bashkia Mirditë me titull “BE për Fëmijët në Rrëshen” i cili do të bëjë të mundur rivitalizimin e hapësirës publike para QKF-së dhe kthimin e saj në një kënd lojrash për më të vegjlit e qytetit të Rrëshenit, por njëkohësisht do të shndërrohet në një hapësirë komunikimi ndërbrezor.  

Ky projekt është një ndër projektet fituese në thirrjen e dytë të projektit “BE për Bashkitë”. 

Pas një pune prej më shumë se një jave, si pasojë e amortizimit të plotë të urës së vjetër të zonës, ku me makina kalohej vetëm nëpër shtratin e përroit, xhenierët e kompanisë së urave të Komandës Xheniere kanë përfunduar me sukses ndërtimin e urës xheniere tip “Bailey” në fshatin Shebe, njësia administrative Kthellë të bashkisë Mirditë, njoftoi më 15 shkurt 2022 Komanda Mbështetëse.

Në ceremoninë e organizuar me këtë rast, komandanti i Komandës Mbështetëse gjeneral brigade Ilir Xhebexhia u shpreh: “Ndërtimi i kësaj vepre prej 18 m e me peshëmbajtje 40 ton është një kontribut tepër i rëndësishëm për lidhjen e komunitetit të kësaj zone, ndaj ju falënderoj sot për punën e palodhur dhe ndërtimin e kësaj ure, e cila nuk është e vetmja pasi kjo kompani vijon punimet edhe në qytetin e Pukës”.

Fillimet e punimeve u ndoqën nga kryetari i bashkisë z. Ndrec Dedaj, i cili u theksoi forcave xheniere, se ky kontribut është tepër i rëndësishëm për këtë zonë dhe disa fshatra, dhe për një fakt, pasi e bën lehtësisht të aksesueshëm për komunitetet përkatëse, për më tepër që tashmë, fshatrat e kësaj zone do të përshkohen nga rruga e asfaltuar Rrëshen-Lurë, që sapo ka filluar.

Zëvendëskryetarja e bashkisë Mirditë Vitore Gjini falënderoi forcat xheniere dhe gjeneral brigade z. Xhebexhia për mbështetjen nga Forcat e Armatosura në ndërtimin e kësaj vepre në kohë rekord, e cila shërben në interes të banorëve të fshatrave Shebe, Malaj dhe Trojes në lidhjen e komunikimin për shërbimet e nevojshme në jetën e përditshme, ekonominë, turizmin dhe mos shpopullimin e zonës.